's Mandl

In der Volksmundart.
Edward Samhaber zum 70. Geburtstage.

Durch d' Stadt geht á Mándl
Mit eisgráwe Haar,
Dös rödt mit eahm selbn
Und lacht wiar á Narr:

I bin bei viel Tausend,
Sagt's, einkehrt, ja, ja,
War iadá dátaddárt:
Dá Siebz'gá is da!

Abá so á Báboantá,
Wia der Liadlmachá
Da magst di nöt ránt'n -
Muaßt höllisch lachá.

Geh, sagt á, sitz' niedá,
Da hast á Glásl Wei(n),
Jatzt wölln má oans singá
Und lusti muaß's sei(n)!

Aft singt á wia á Jungá,
Dáß's um und um hallt:
Von Bácherl und Bleámerl,
Von Vogerl in Wald.

I los eahm so zua -
Is 's Ernst oder Gspoaß?
Da hat er mi bein Fráck scho(n)
Und mir tanzn in Kroas.

Du Haderlump, sagt á,
Jatzt woaßt es do g'wiß,
Daß oaner von uns da
Koa Siebz'gá nöt is.

Koa Siebz'gá nöt is;
In Herz und in Gmüat,
Aus dem eahm dá G'sang
Wiár á Rosenstock blüaht!

Ja, ja, sag i dráf,
's muaß woltá so sei(n);
Ja, d' Bleamerln - und 's Bácherl -
Und 's G'sang - und dá Wei(n)!

Und weidá geht's Mándl
Und pfugázt und lacht:
Der Sákrá ,der hät' mi
Frei selber jung g'macht!